UN
LIBRO CADA SEMANA
SEMANA
DO 6 AO 10 DE OUTONO (TAMÉN CHAMADO ‘OUTUBRO’)
Hoxe
anímovos a que leades Días que non foron
do coruñés Luís Rei Núñez (quen, por certo, acaba de publicar un novo libro,
que haberá que ler en canto se poida).
Días que non foron é un monllo de relatos que
abranguen un amplo arco de tempo: desde a nosa historia aínda recente, con
cheiro a chapapote (“O corvo de chapapote”) ata a historia que viviron os nosos
avós ou os nosos país (velaí o espléndido relato “A lancha dos segredos sucios”).
Este e o titulado “Coridón” son, sen dubidalo, os meus favoritos.
Mais
todas as narracións se deixan acariñar moi ben polos nosos ollos e pola nosa
mente. A lingua, en xeral, non dá problemas, e ten páxinas para a historia. A
fraseoloxía, por exemplo, é riquísima (hai algunha forma que eu descoñecía,
coma esta: Teño un telumbre, e hai
outras que o noso autor usa con naturalidade, e que para nós son absolutamente
familiares, malia estar medio etiquetadas de ‘castelanismo’, como é o caso
destoutra: máis vello que Carracuca)
Un libro máis para o cesto! En dúas noites ou
nunha tarde de chuvia, se vos poñedes, lédelo. E desde logo, para os coruñeses
da miña xeración, as lembranzas daquela Coruña suporán un aliciente extra.
Mª
Rosario Soto Arias, membro do equipo da Biblioteca do IES ‘Eusebio da Guarda’
Ningún comentario:
Publicar un comentario