luns, 16 de febreiro de 2015

UN LIBRO CADA SEMANA

UN LIBRO OU UN FILME (BASEADO NUN LIBRO) CADA SEMANA



A Teoría do Todo


Esta película, baseada nun libro da primeira esposa do astrofísico e cosmólogo Stephen Hawking, leva recollidos unha morea de premios, e aínda lle queda algún máis por celebrar.

Percorre a vida dos protagonistas desde que se coñeceran ata que o físico é recoñecido coma un 'fóra de serie' no mundo científico. Polo tanto, podemos clasificalo no mundo dos biopics. O relato é formal, lineal. Arrinca cun Stephen pedaleando cheo de vida polas rúas dun Cambridge, que nos lembra as películas de Harry Potter. Claro, moitas imaxes foron tomadas nos mesmos sitios.



O universo de Hawking crece e crece: aparecen máis personaxes, chegan os fillos, outros científicos... e ao mesmo tempo o individuo vaise achicando, vítima dunha enfermidade especialmente lacerante. O protagonista perde mobilidade pouco a pouco. Coma espectador empezas a moverte na butaca tentando axudarlle nos seus torpes intentos... Cando só lle quedan os xestos para se comunicar, o espectador apreta as uñas nas mans, mestura da ansiedade que transmite ao mesmo tempo que dis: "Este tío pode con todo!"

Tiven a oportunidade de ver a este científico fai uns anos en Santiago. En vivo!. Aquela experiencia non daba saído da miña cabeza ao ver a película. Aínda agora que escribo estas liñas todas esas lembranzas veñen de novo.

Non deixes de vela se podes!

(Mario S. García, prof. de Tecnoloxía do IESP ‘Eusebio da Guarda’)

Ningún comentario:

Publicar un comentario