Un filme, baseado nunh libro, cada semana...ou cada mes..."Into the wild"

  A película está baseada no libro de Jan Kraka. A historia trata sobre Christopher Mc Candless, un home que, ao rematar a universidade, inspirado por Thoreau ou Tolstoi,  e canso do materialismo, a hipocrisía e o egoísmo da sociedade, decide emprender unha viaxe a Alaska para atopar na natureza a felicidade e o verdadeiro sentido da vida. No camiño vive moitas experiencias e deixa todo o seu mundo atrás, pero, cando finalmente chega ao seu destino, atópase só, afastado de todos na soedade da vida salvaxe e dáse conta de que a felicidade só é real cando é compartida.

Nesta película atópanse moitos valores e ensinanzas, ademais dunha reflexión sobre a nosa sociedade e sobre nós mesmos. Trátanse temas coma o materialismo e as aparencias, o moito que temos e o pouco que necesitamos realmente. A familia de Christopher é  unha familia desestruturada á que só lle importa aparentar estar ben, con coches caros e un fillo con boas cualificacións académicas. Fálase tamén da procura de identidade, do amor e do perdón aos demais e a un mesmo.

Ademais, a banda sonora desta película é excelente , case todas as cancións son de Goldie Vedder e tratan temas moi axeitados á historia: o rexeitamento da sociedade, a liberdade e a natureza.

Outro aspecto destacable son as paisaxes; vemos moitas cidades diferentes na viaxe de Christopher: as imensas montañas no corazón de Alaska.

Na miña opinión, esta é unha película que todo o mundo debería ver polo menos unha vez na vida. Vemos a sociedade que seguimos tendo, convertidos en persoas materialistas que miran por riba do ombro aos que teñen menos. Somos seres egoístas, e estamos tan cegados pola sociedade que esquecemos o realmente importante: os valores e o sentido da propia vida. Centrámonos en estudar, traballar, ter unha boa casa e ser mellores que os demais. Esquecemos que o noso tempo neste mundo é breve e non vivimos a vida como deberiamos, non nos centramos en buscar o noso propio sentido e felicidade, deixámonos levar para ser como o sistema quere que sexamos.

Penso que todos somos Christopher Mc Candless, e por iso esta película é unha obra mestra: profunda, moralista e, sobre todo, real. 

                                          Jéssica Lesta González, 1º Bacharelato Adultos.

Un filme cada semana...ou cada mes..."Toy story 3"

 O filme trata dun grupo de bonecos cuxo dono se fai maior e bótanos no lixo, excepto a Budy, que foi a unha gardaría que, aínda que ao principio parecía ben, sería practicamente o cárcere dos bonecos...

A película xa empeza ·"forte", porque botan aos bonecos no lixo, e a min gústame que as pelis empecen con problemas para os protagonistas. O boneco que máis me gusta é o dinosauro, porque é torpe e non moi intelixente, recórdame a min...A película dá un xiro de 90 graos cando o tenro osiño resulta ser o malo da película: cóntanos que foi abandonado pola súa dona e sente ira e rabia...Gústame moito o papel de "malote" do osiño...

Na miña opinión, é a mellor película de animación da historia.

                                       Ángel Díaz Jiménez, ESA 3, Adultos.

Un libro cada semana...ou cada mes..."O monxe que vendeu o seu Ferrari"

 Robin Sharma, a través desta fábula, dá a coñecer ideas prácticas para mellorar a nosa calidade de vida; trátase de difundir a sabedoría espiritual de Oriente ás nosas vidas occidentais. 

O libro narra a historia dun exitoso avogado que cría que tiña todo  até que sufriu un ataque cardiaco que fixo que se cuestionase a súa vida. Vendeu todos os seus bens materiais e marchou á India a atoparse a si mesmo. Coñeceu os sabios de Sivana, onde o yogui Raman ensinoulle un método para explotar o seu potencial e vivir con máis paz, sabedoría e paixón. Despois de regresar á casa, comparte toda a súa sabedoría cun ex compañeiro de traballo.

Neste libro aprendes a cultivar o corpo, a mente e a alma dun xeito máis equilibrado, con pensamentos máis optimistas e positivos, dándolle gran importancia ao tempo, pensando sempre en que e en quen o invistes: investir en bos hábitos.

Un punto moi importante deste libro é que non hai erros, só leccións; isto dá oportunidade de expandirse persoal e espiritualmente. Invita a reflexionar sobre a importancia de marcarse obxectivos e traballar moi duro e vivir sempre no presente e no agora.

                                                                  Candy Estephany Chino Quispe, 1º Bacharelato Adultos.

Un filme, baseado nun libro, cada semana...ou cada mes..."A lingua das bolboretas"

 

"A Lingua das Bolboretas" é unha película ambientada en 1936, no contexto da Segunda República e o golpe de estado realizado por parte dos sublevados, que derivou na implantación da ditadura. A historia céntrase na amizade dun profesor progresista que actúa coma mentor, Don Gregorio, e Moncho, o seu alumno, que é fillo de simpatizantes republicanos e presenta  dificultades sociais.

A ambientación da película é bastante correcta, dado que reflicte de forma completa a situación vivida nesa época e o sentir da poboación, sobre todo na transmisión  da evolución da vida por parte dos republicanos. Os actores interpretan un difícil papel de maneira extraordinaria, con destacables recursos actorais e un sobresaínte Fernando Fernán Gómez. O vestiario representa o mesmo estilo que usaba a poboación na década dos 30, e a fotografía é o punto máis débil, pero acorde aos recursos que posuían en 1999.

                             Alexia Miranda Coelho, 1º Bacharelato Adultos.

                                                             

Letras Galegas 2021

 

Letras Galegas 2021

 

Un libro cada semana...ou cada mes..."Trilogía Reina Roja"

 

Antonia Scott é especial. Demasiado especial. Non é policía nin criminalista. Nunca empuñou unha arma nin levou unha placa, e, sen embargo, resolveu decenas de crimes.

Pero hai un tempo que Antonia non sae do seu ático de Lavapiés, un barrio madrileño. As cousas que perdeu  impórtanlle moito máis que as que a esperan fóra.

Tampouco recibe visitas. Por iso non lle gusta nada de nada cando escoita uns pasos descoñecidos subindo polas escaleiras ata o último piso.

Sexa quen sexa, Antonia está segura de que vén  buscala, e iso gústalle  aínda  menos....

Un thriller que cativou a máis dun millón de lectores.

                                              

É o segundo libro da triloxía de "Reina Roja".

Nesta continuación,  Antonia intenta seguir viva e non ten medo a nada, só a si mesma. Nunca foi unha persoa que impuxesese ás outras,  e nunca foi moi perigosa, pero hai alguén máis perigoso ca  ela. Alguén podería vencela. Nesta novela vai ter moi difícil escapar dos inimigos,  xa que a loba negra está cada vez máis cerca. E Antonia, por primeira vez na súa vida, ten medo.

Esta novela fai que o lector se enganche máis á trama que iniciou o autor con "Reina Roja" é tamén fai que cada vez  guste  máis Antonia Scott.

                                                           

ESPERO QUE NON TE ESQUECESES  DE MIN ¿XOGAMOS?

Cando Antonia Scott recibe esta mensaxe, sabe moi ben quen   llo envía. Tamén sabe que ese xogo é case imposible de gañar. Pero a Antonia non lle gusta perder.

Despois de todo este tempo fuxindo, a realidade acabou alcanzándoa. Antonia é cinturón negro en mentirse a si mesma, pero agora ten claro que,  se perde esta batalla, terá perdido todas.

 

-         A Raíña  é a figura máis poderosa do taboleiro- di o Rei Branco-. Pero por poderosa que sexa unha peza de xadrez, nunca debe esquecer que hai unha man que a move.

-         Iso xa o veremos- di Antonia.

 

O FINAL SÓ É O PRINCIPIO.

 

Terceira e última novela da Trilogía  de la  Reina Roja. Para min,  a mellor novela das tres,  xa que a trama me trasladou  onde transcorría  e a  a tensión dura ata o final... Pensades que é o final? Eu espero que non.

                                         Pablo Miñambres López Perea, 2º Bacharelato Adultos.