UN LIBRO CADA SEMANA
SEMANA DO 1 A0 5 DE NADAL
Hoxe quérovos recomendar “Mar interior”, o
novo libro do coruñés Miguelanxo Prado.
O título remítenos á exposición que se
inaugurara a principios de agosto no Museo das Peregrinacións de Santiago de
Compostela. Unha exposición que reúne 59 obras orixinais de Miguelanxo e que
permanecerá aberta ata o 31 de decembro, é dicir, que aínda tedes tempo de
achegarvos á capital do vello reino para vela.
Con ese gallo, o propio autor deu unha
conferencia a principios de novembro; e aí falou dos distintos fíos condutores
que conforman o entradamado da súa polifacética obra: banda deseñada,
cartelismo, ilustración de libros, ilustración en prensa, literatura, cine...
Esperade un momentiño que lle cedo a palabra a
este coruñés universal: “Se tivese que facer agora as miñas primeiras obras,
faríaas cos matices que aporta a experiencia pero igual. Manteño as miñas
orixes, o meu sinal de identidade. É un paradoxo o feito de ser consciente do
tempo pasado e, ao mesmo tempo, percibir que a maior parte dos impulsos que me
levaron á banda deseñada, ao mundo da ilustración, ao cartelismo... seguen a
funcionara dentro dos mesmos rexistros”.
Pois ben, o libro que hoxe traemos á palestra
complementa a exposición. Esta escolma das obras paradigmáticas ou máis
representativas de Miguelanxo Prado, presentes arestora en Santiago, ao estaren
en forma de libro, permítenos un achegamento doado á fonte orixinal: como nos permite que a atesouremos e teñamos
sempre a man na biblioteca de casa.
Desfrutade, así pois, dos artistas que dá a
nosa terra.
(Mª Rosario Soto Arias, membro do equipo da Biblioteca do IES 'Eusebio da Guarda')
(Mª Rosario Soto Arias, membro do equipo da Biblioteca do IES 'Eusebio da Guarda')
Ningún comentario:
Publicar un comentario