UN LIBRO CADA SEMANA
SEMANA DO 11 AO 15 DE MAIO DO 2015
Santiago LOPO, A diagonal dos tolos.
A
diagonal dos tolos é unha carreira na que se atravesa a pé a illa da Réunion, no Índico. Recibe o
seu nome da dureza da carreira, que provoca,
mesmo, a morte dalgúns
participantes. Con este punto de partida, Santiago Lopo constrúe unha
interesante historia na que, alternando capítulo a capítulo dous momentos
temporais na historia da illa, o presente e os tempos da escravitude (a illa é,
na actualidade, departamento francés e foi, no pasado, destino de escravos alí
levados a traballar duramente), se nos conta a carreira dun "marron",
escravo que foxe do horror e a de Pierre, un francés reunionés noivo dunha
galega (este é o único elo con Galicia nesta interesante historia) que se ve
obrigado a facer a carreira por motivos familiares.
A través destas dúas historias paralelas e á
vez contrapostas, coñecemos a historia da illa e, por extensión, a difícil
convivencia en sociedades mestizas; o racismo, o clasismo, pero tamén o mutuo
enriquecemento entre as distintas comunidades, do que dá mostra o idioma
autóctono, o créole, do que se nos ofrecen pequenos exemplos na obra.
Ë unha novela bastante breve, que se le con
pracer porque conta unha historia que nos fai coñecer unha cultura moi afastada
da nosa pero na que tamén asistimos a temas universais, como a loita pola vida
ou o amor. E todo, nun estilo áxil, claro, tan trepidante como a propia
carreira.
Moi recomendable.
Susana
Piensos.
Ningún comentario:
Publicar un comentario