UN LIBRO CADA SEMANA
SEMANA DO 29, SAN MIGUEL, AO 3 DE OUTONO
Este verán lin dous libros con certas semellanzas que vos
recomendo. Un é Astrid y Verónika, de
Linda Olsson. Verónica vai vivir a unha casa de campo, en Suecia, tras sufrir
unha perda importante. Alí coñecerá a Astrid, unha anciá a quen a xente alcuma “a
bruxa” pola súa frialdade e falta de contacto humano. Parece ao primeiro que
non teñen nada en común, pero acabarán unidas pola amizade e será así como
logren superar as súas carencias e os seus tormentos interiores.
O outro libro é Juntos,
nada más, de Anna Gavalda. Encontrámonos novamente con varias persoas que
inicialmente non teñen gran cousa en común, e que, non obstante e sempre grazas
á amizade, vencen atrancos e resolven situacións que vivían como as peores da
súa vida.
Ademais de seren estas dúas obras semellantes canto ao tema
(a relación de amigos como boa maneira de superar momentos difíciles na vida),
tamén teñen en común unha forma lenta e pausada de narrar. E eu aínda diría que
en ambas as dúas hai como un toque delicioso que fai que queiras relelas.
Ana Fernández Cedeira, 3ª A.
