luns, 3 de novembro de 2014

UN LIBRO CADA SEMANA

UN LIBRO CADA SEMANA

SEMANA DO 3 AO 7 DE NOVEMBRO



Traio ás vosas mans novamente poesía, esta vez dun autor de casa. Un poeta galego de casta atlántica. Con sensibilidade ancorada nas vellas formas, nas Cantigas que estudamos en primeiro de Bacharelato con certa fondura. Gústalle a Xulio L. Valcárcel o leixaprén. Tomar e deixar (así por exemplo, toma a derradeira palabra –descoñecidos- e déixaa, póusaa como a primeira da seguinte composición). Un efectivo galaico modo de facer, de enguedellar verso a verso, poema a poema. É o recurso por excelencia neste libriño que hoxe vos aconsello ler: “Solaina da ausencia”.

Escollo para vós unha belida páxina:


De ti, quéda-me o nome.

Sinxelo cristal,

na escuma das copas

volta o teu nome musical

case olvidado.

Abocados ao vacío

en tempestades de fúria,

en abertos estertores

ven o teu nome como unha áncora.



Que hei dicer eu, miña amada?



Todo apodrece nunha néboa

na que seremos ti e eu, amor,

descoñecidos.
(Mª Rosario Soto Arias, membro do equipo da Biblioteca do IES 'Eusebio da Guarda')

Ningún comentario:

Publicar un comentario